தேர்தல்கள் ஆணைக்குழுவினால் தயாரிக்கப்பட்டுள்ள ஊடக வழிமுறைகளை மீறும் ஊடகங்கள் தொடர்பில் நடவடிக்கை எடுக்கும் அதிகாரத்தைக் குறித்த ஆணைக்குழுவுக்கே வழங்குமாறு அதன் தலைவர் நிமல் புஞ்சிஹேவா கோரிக்கை விடுத்துள்ளார்.
தேர்தல் சட்டங்கள் மற்றும் தேர்தல் முறைமை சீர்திருத்தம் தொடர்பான பாராளுமன்ற விசேட தெரிவிக்குழு கூடியது. அதில் தேர்தல் ஆணைக்குழு உறுப்பினர்களும் கலந்துகொண்டிருந்தனர். அதன்போது கருத்துகளை முன்வைக்கும்போதே அவர் இதனைத் தெரிவித்தார்.
தேர்தல் காலத்தில் ஊடகங்கள் மற்றும் சமூக ஊடகங்களை ஒழுங்குபடுத்துவதற்கு உரிய வேலைத்திட்டமொன்று முன்னெடுக்கப்பட வேண்டும் என்றும் அவர் மேலும் குறிப்பிட்டார்.
அத்துடன், வேட்புமனுக்களைத் தாக்கல் செய்யும்போதே சொத்துக்கள், பொறுப்புக்களை வெளிப்படுத்துவதற்கான பொறிமுறையொன்று உருவாக்கப்பட வேண்டும் எனவும் அவர் பரிந்துரைகளை முன்வைத்தார்.
இதேவேளை, தற்பொழுது நடைமுறையில் உள்ள உள்ளூராட்சி மன்ற தேர்தல்கள் சட்டத்தின் கீழ் காணப்படும் வேட்பாளர்களின் கட்டுப்பணத்தை இரத்துச் செய்யும் நடைமுறை விரிவான திருத்தத்துக்கு உள்ளாக்கப்பட வேண்டும் என்றும் பாராளுமன்ற விசேட குழுவில் தேர்தல்கள் ஆணைக்குழு இதன்போது சுட்டிக்காட்டியது.
மாற்றுத்திறனாளிகள் வாக்களிப்பதற்கு நடமாடும் வாக்களிக்கும் முறையொன்று தயாரிக்கப்பட வேண்டும் என்றும், பார்வையற்றவர்கள் ‘ப்ரெயில்’ முறையின் கீழ் வாக்களிப்பதற்கு வாய்ப்பளிக்கும் வகையில் புதிய மாற்றங்கள் மேற்கொள்ளப்பட வேண்டும் தெரிவிக்கப்பட்டது.
வெளிநாட்டில் உள்ள பணியாளர்களின் வாக்குரிமையைப் பாதுகாக்கும் வகையில் புதிய வேலைத்திட்டமொன்று நடைமுறைப்படுத்தப்பட வேண்டும். வேட்புமனுக்களைக் கையளிக்கும்போதே சொத்துக்கள், பொறுப்புக்களை வெளிப்படுத்தும் பொறிமுறையொன்று நடைமுறைப்படுத்தப்பட வேண்டும் எனத் தேர்தல் நடத்தை விதி சட்டப்பூர்வமாக்கப்பட வேண்டும்.
இலத்திரனியல் வாக்கு எண்ணும் நடைமுறை பின்பற்றப்பட வேண்டும் என்பது ஆணைக்குழுவின் நிலைப்பாடாக இருந்ததுடன், வாக்களிப்பு நிலையங்களிலேயே வாக்குகள் எண்ணும் பணிகள் முன்னெடுக்கப்படுவது நடைமுறைச்சாத்தியமானது என்றும் தெரிவிக்கப்பட்டது.
ஒரு நபருடைய பெயர் இரண்டு இடங்களில் வாக்காளர் இடாப்பில் பதிவு செய்யப்படும் சம்பவங்கள்குறித்து நாடாளுமன்ற விசேட குழுவின் உறுப்பினர்கள், தேர்தல்கள் ஆணைக்குழுவிடம் சுட்டிக்காட்டியிருந்தனர்.
தேர்தல் காலத்தில் இடம்பெறுகின்ற வேலைநிறுத்தங்கள் மற்றும் போராட்டங்கள் நீதியான மற்றும் சுதந்திரமான தேர்தல்களுக்குத் தடையாக உள்ளது என்றும் ஆணைக்குழு, பாராளுமன்ற விசேட குழுவிடம் தெரிவித்தது.
இதேவேளை, பாராளுமன்ற உறுப்பினர் பதவியொன்று வெற்றிடமாகும்போது இடைத்தேர்தல் ஒன்றின் மூலம் அந்த வெற்றிடத்தை நிரப்புவது தொடர்பிலும் பாராளுமன்ற விசேட குழு கலந்துரையாடியது.
